కాశీబుగ్గ పీఎస్‌లో అప్పలరాజు విచారణ.. ఏం తేలింది?

గొర్రెల కాపరి దానయ్య మృతి కేసులో ఆరోపణలు ఎదుర్కొంటూ రిమాండ్‌లో ఉన్న మాజీ మంత్రి సీదిరి అప్పలరాజుకు విధించిన ఒకరోజు పోలీస్ కస్టడీ ముగిసింది. విచారణ అనంతరం ఆయనను తిరిగి శ్రీకాకుళం జిల్లా అంపోలు జైలుకు తరలించారు. పలాస కోర్టు అనుమతితో మంగళవారం కాశీబుగ్గ పోలీస్ స్టేషన్‌లో అధికారులు ఆయనను విచారించారు.

దానయ్య మృతి కేసులో ఏ3గా ఉన్న అప్పలరాజును కాశీబుగ్గ, టెక్కలి డీఎస్పీలు భవానీ, లక్ష్మణరావుల పర్యవేక్షణలో సోంపేట సీఐ మంగరాజు ప్రశ్నించారు. మధ్యాహ్నం 12 గంటల నుంచి సాయంత్రం 4 గంటల వరకు సుమారు నాలుగు గంటల పాటు ఈ విచారణ కొనసాగింది. దానయ్య మృతికి కారణమైన రోడ్డు ప్రమాదం ఎప్పుడు జరిగింది, ఘటనా స్థలానికి ఆయన ఎంత సమయానికి చేరుకున్నారు వంటి అంశాలపై అధికారులు ఆయన్ను ప్రశ్నించినట్లు సమాచారం.

అయితే, ఈ విచారణలో అప్పలరాజు గతంలో చెప్పిన సమాధానాలనే పునరుద్ఘాటించినట్లు తెలుస్తోంది. విచారణలో ఎలాంటి కొత్త విషయాలు వెల్లడి కాలేదని సమాచారం. కస్టడీ గడువు ముగిసిన వెంటనే పోలీసులు ఆయన్ను తిరిగి అంపోలు జైలుకు తరలించారు.